हुम्लाको नाम्खा गाउॅपालिका–६ तिलगाउॅमा  बिहीबार राति ११ बजेतिर लेदोसहितको पहिरो आएको प्रमुख जिल्ला अधिकारी नारायण पाण्डेयले बताए । उनका अनुसार भौगोलिक विकटताका कारण सुरक्षाकर्मीको टोली पुग्न समस्या भएपछि ढिलो गरी घटना सार्वजनिक भएको हो ।

पहिरोको कारण २ घरमा क्षति भएको छ भने १८ परिवारलाई सुरक्षित स्थानमा सारिएको छ ।
‘गाउॅमाथि एउटा ताल रहेको गुगल म्यापमा देखियो, त्यही ताल फुटेर गाउॅमा क्षति पुगेको आशंका छ, त्यसको पुष्ट्याइएको लागि ५ जना स्थानीयलाई पठाएका छौं, तर टोली अझैसम्म नपुगेकाले केही भन्न सकिने अवस्था छैन,’ उनले भने, ‘क्षतिको विवरण पनि अझै आएको छैन ।’ उनका अनुसार समुद्र सतहदेखि झण्डै ५ हजार ४ सय मिटरको उचाइमा उक्त ताल छ । अहिले घटनास्थलमा जिल्ला प्रहरी प्रमुखसहित सुरक्षाकर्मीको टोली पुगेको छ ।

प्रमुख जिल्ला अधिकारी पाण्डेयका अनुसार १८ घर उच्च जोखिममा परेपछि ३२ जनालाई खुला चौरमा सारिएको छ । तिलगाउॅमा ५० घरधुरीमध्ये १८ घरधुरी बसोबास गर्दै आएका छन् । पहिरोले तिल्चुङ खोलाका ५ वटा काठे पुल बगाएको नाम्खा—६ का वडाध्यक्ष पाल्जोर तामाङले बताए । उनका अनुसार सुरक्षाकर्मीको टोली गाउॅमा पुगेकाले क्षतिको विवरण संकलन भइरहेको छ ।