काठमाडौँ– अर्थमन्त्री प्रकाशशरण महतले विद्युतीय गाडीमा बढाइएको कर नघट्ने बताएका छन् । शुक्रबार राष्ट्रिय सभामा बजेटमाथि उठेका प्रश्नहरुको जवाफ दिने क्रममा अर्थमन्त्री महतले करको दर नघट्ने स्पष्ट पारेका हुन् ।

‘विद्युतीय गाडीको कर घट्दैन । यो यथावत रहला वा बढ्ला तर, घट्दैन,’ उनले भने ।

विद्युतीय सवारी साधन आममानिसले प्रयोग नगरिरहेकाले राज्यले विद्युतीय सवारी साधनलाई प्रोत्साहन गर्ने नीति लिए पनि कर नघट्ने उनको भनाइ छ ।

सरकारले आगामी आर्थिक वर्ष २०८०–८१ को बजेटमार्फत ५१ देखि १०० किलोवाटसम्मका निजी विद्युतीय सवारी साधनमा ५ प्रतिशत भन्सार शुल्क बढाएको छ । यसअघि अन्तःशुल्क नगाल्ने गरेकोमा १० प्रतिशत अन्तः शुल्क पनि तोकेको छ ।

यी दुवै निर्णयलाई लिएर अहिले व्यापक विरोध भइरहेको छ ।

अर्थमन्त्री महतले बजेटमाथि उठेका प्रश्नको जवाफसँगै राष्ट्रिय सभा दुई साताका लागि स्थगित भएको छ । अर्को बैठक आगामी असार १० गते बस्नेछ ।