Global Force Media

२०८१ श्रावण ८ - Tue Jul, 2024 -

स्थानीय वस्तुको बजारीकरणलाई प्राथमिकता दिनुपर्छ : सञ्चारमन्त्री शर्मा

स्थानीय वस्तुको बजारीकरणलाई प्राथमिकता दिनुपर्छ : सञ्चारमन्त्री शर्मा

३ फागुन, दाङ । सञ्चार तथा सूचना प्रविधिमन्त्री रेखा शर्माले स्वदेशी उत्पादन बढ्दै गए पनि यसको पूर्ण बजारीकरण अझै हुन नसकेको बताएकी छन् ।

घरेलु तथा साना उद्योग महासङ्घ दाङको आयोजनामा बुधबारदेखि दाङको घोराहीमा सुरु भएको लुम्बिनी प्रदेशस्तरीय साना तथा घरेलु उद्योग, पर्यटन तथा कृषि प्रदर्शनीको उद्घाटन गर्दै उहाँले स्थानीय कृषि उत्पादन बढ्दै गए पनि बजारीकरणको व्यवस्थापन हुन नसक्दा साना उद्यमी मारमा पर्ने गरेको बताइन् ।

नेपालको हावापानी, माटो, भूगोल फरक फरक भएको हुँदा स्थानीय परिवेशअनुसारको विशेषतायुक्त वस्तुको उत्पादनलाई अब ब्रान्डिङ गर्ने काममा लाग्नुपर्ने उनको भनाइ थियो । ‘हामीसँग हिमाल छ, पहाड छ, तराई छ, त्यहाँको भूगोल अनुसार हरेक कुराको उत्पादनमा विशेषता छ’, उनले भनिन्, ‘यसको महत्त्वलाई बिक्री गर्ने काममा हामी चुकिरहेका छौँ, यस प्रकारका प्रदर्शनीले स्थानीयस्तरमा उत्पादित वस्तुका लागि अवसरका रूपमा ल्याउन सक्नुपर्छ।’

घरेलु तथा साना उद्यमीले पछिल्लो समय उद्यमशीलताको विकास गर्दै अनुकरणीय काम गर्दै आएको उल्लेख गर्दै मन्त्री शर्माले भनिन्, ‘यो समृद्धिको आधार हो’, अब यसलाई व्यवस्थितरूपमा अघि बढाउन जरुरी छ । साना उद्यमीलाई प्रोत्साहन गर्ने गरी यस प्रकारका प्रदर्शनी उपयोगी हुनेछ भन्ने विश्वास छ ।’

उनले दाङ कृषि क्षेत्रका लागि उर्वरभूमि भए पनि पुराना रैथाने वस्तु र कृषि उत्पादन लोप हुँदै गएको प्रति चिन्ता व्यक्त गरिन् । हिजोका दिनमा प्रयोगमा रहेका सामग्री तथा कृषि उत्पादनको साटो आधुनिक कृषि प्रणालीले विस्थापित गर्दै लगेको हुँदा दाङको विशेषता बोकेका कुरालाई प्रदर्शनीले उजागर गर्न सक्नुपर्नेमा उनले जोड दिइन् ।

‘दाङ तोरी, तिलकी चामल, अनदी तथा अरु स्थानीय खाद्यान्नका लागि कहलिएको जिल्ला भएको हुँदा पछिल्लो समय यी कुराको उत्पादनमा ह्रास भइरहेको छ’, उनले भनिन्, ‘पहिचान दिने वस्तुको महत्त्व बुझौँ र यस प्रकारका प्रदर्शनीका माध्यमबाट उजागर गर्नेतर्फ ध्यान देऔँ ।’

उनले स्वदेशमा उत्पादन बढ्दै गएमा देशको समृद्धि तथा रोजगारी सिर्जना गर्नसमेत सहयोग पुग्ने हुँदा कृषिका लागि धेरै सम्भावना बोकेको यस जिल्लाको सही सदुपयोग गरेर अगाडि बढ्नुपर्ने बताइन् ।

कार्यक्रममा प्रदेशसभा सदस्य राजु खनालले कृषि उत्पादनलाई प्राथमिकता दिएर प्रदर्शनीले बजारीकरणमा सहयोग गर्ने विश्वास व्यक्त गरिन् । आर्थिक समृद्धिका लागि स्थानीय उत्पादन आवश्यक रहेको हुँदा ती उत्पादनलाई अब बजारसँग जोड्ने अभियानका कार्यक्रमलाई प्रदेश सरकारले महत्त्वका साथ उठाउने उनले बताइन् ।

नेपाल पत्रकार महासङ्घका केन्द्रीय अध्यक्ष विपुल पोखरेलले कृषि प्रदर्शनीले स्थानीय उत्पादनलाई चिनाउने र बजारीकरणमा भूमिका खेल्ने बताए । साना तथा घरेलु उत्पादनका साथै कृषि क्षेत्रमा भएका नमूनायोग्य कामलाई चिनाउन प्रदर्शनीले सफलता पाउने उनले विश्वास व्यक्त गरे ।
नेपाल घरेलु तथा साना उद्योग महासङ्घका केन्द्रीय उपाध्यक्ष नेत्र पाठकले दाङ शाखाले आयोजना गरेको प्रदर्शनीले स्थानीय उत्पादनलाई अरु ठाउँमा पनि परिचित गराउने बताए । उनले यसका लागि यस क्षेत्रमा रहेका मौलिकता बोकेका वस्तु र उत्पादनलाई प्रदर्शनीमा ल्याउन आग्रह गरे ।

Leave a Reply

Company Information

ग्लोबल फोर्स मिडिया प्रा. लि.(Global Force Media Pvt. Ltd.)
अध्यक्ष /संचालक: रमेश बसेल
सम्पादक: गोविन्द बहादुर बुढा
सुचना तथा प्रसारण विभाग दर्ता नं
3623-2079/2080
म्यानेजिङ डाईरेक्टर /संचालक: राजन मगर
कम्पनी दर्ता नं: 295102/079/080
प्यान नं: 610327171

Contact Information

Global Force Media Pvt. Ltd.
Pacha Dhara - 3, Nagarjun, Kathmandu

9851048327
info@globalforce.com.np
globalforcenp@gmail.com
www.globalforce.com.np