Global Force Media

२०८१ जेष्ठ ११ - Fri May, 2024 -

पत्रकारिता जगत सशक्त बनाउन हाम्रो साथ छ : सभामुख पाठक

पत्रकारिता जगत सशक्त बनाउन हाम्रो साथ छ : सभामुख पाठक

चितवन । संसदको गतिविधि जनतामाझ लैजान र सांसदहरूलाई झक्झक्याउनसमेत पत्रकारिता जगत सशक्त हुनुपर्ने बागमती प्रदेश सभामुख भुवनकुमार पाठकले बताएका छन् । यसका लागि प्रदेश सभाले पत्रकारसँग सदा सहकार्य गर्ने उनले बताए ।

पत्रकारिता क्षेत्र पछिल्लो समय सशक्त रूपमा विकास भएकोले विकृति रोकथाममा योगदान गरेको बताउँदै सभामुख पाठकले देश र समाजको यथार्थ र वास्तविकतालाई सहजै उपलब्ध हुने वातावरण सिर्जना भएको सभामुख बताए । बागमती प्रदेश सभा सचिवालयले चितवनको सौराहामा आयोजना गरेको सञ्चारकर्मीहरूसँग अन्तरक्रिया तथा संसदीय रिपोर्टिङ सम्बन्धी दुई दिने प्रशिक्षण कार्यक्रमको उद्घाटन गर्दै पाठकले यस्तो बताएका हुन् ।

कार्यक्रममा उपसभामुख अप्सरा चापागाईं खत्रीले बागमती प्रदेश संघीय राजधानी समेत रहेको र अन्य विविधताको हिसाबले आमसञ्चारमा महत्त्वपूर्ण भूमिका निर्वाह गर्ने बताइन् । संसदले जनताका आवाज सम्बोधन गर्नुपर्ने र चुकेका विषयमा खबरदारी गर्नुपर्ने भएकोले पत्रकारको भूमिका इमान्दारितापूर्वक निभाउन उनले आग्रह गरिन्। जनताका लागि सञ्चार संवाहक बनेर लागिपरेका पत्रकारलाई संसदले सधैँ सहयोग गर्ने उपसभामुख चापागाईंले बताइन् ।

कार्यक्रममा प्रदेश सभा सचिव कृष्णहरि खड्काले संसदीय रिपोर्टिङ गर्ने पत्रकारलाई कानून जानकारी अपरिहार्य रहेको बताए । संसदीय रिपोर्टिङमा पत्रकारको पहुँच कम भएको आभास आफूलाई भएको उनले बताए । बागमती प्रदेश सभाका सूचना अधिकारी सुन्दर बास्कोटा, नेपाल पत्रकार महासंघ केन्द्रीय सदस्य सुनिल खड्का, नेपाल पत्रकार महासंघ बागमती प्रदेश उपाध्यक्ष रुपेश दुलाललगायतले प्रदेश सभाको गतिविधि रिपोर्टिङ र चुनौती बारे जानकारी गराएका थिए ।

मकवानपुर र चितवनका ४० जना पत्रकारको सहभागिता रहेको प्रशिक्षण कार्यक्रममा वरिष्ठ पत्रकार तथा इकागज अनलाइनका प्रधान सम्पादक हरिबहादुर थापाले प्रशिक्षण दिनेछन् । लामो समय संसदीय पत्रकारिता गरेका थापासँग संसदीय अभ्यासको सीप सहभागीले हासिल गर्ने छन् ।

Leave a Reply

Company Information

ग्लोबल फोर्स मिडिया प्रा. लि.(Global Force Media Pvt. Ltd.)
अध्यक्ष /संचालक: रमेश बसेल
सम्पादक: गोविन्द बहादुर बुढा
सुचना तथा प्रसारण विभाग दर्ता नं
3623-2079/2080
म्यानेजिङ डाईरेक्टर /संचालक: राजन मगर
कम्पनी दर्ता नं: 295102/079/080
प्यान नं: 610327171

Contact Information

Global Force Media Pvt. Ltd.
Pacha Dhara - 3, Nagarjun, Kathmandu

9851048327
info@globalforce.com.np
www.globalforce.com.np