काठमाडौँ- प्रतिनिधिसभाले विद्युत् विधेयक, २०८० माथि विचार गरियोस् भन्ने प्रस्ताव स्वीकृत गरेको छ ।

सोमबार बसेको बैठकमा ऊर्जा, जलस्रोत तथा सिँचाइमन्त्री शक्तिबहादुर बस्नेतले प्रस्तुत गरेको विद्युत् विधेयक, २०८० माथि विचार गरियोस् भन्ने प्रस्ताव सर्वसम्मतले स्वीकृत गरेको हो । त्यसअघि बैठकमा विधेयकमाथि सांसदहरूले राखेका प्रश्नको जवाफ दिँदै ऊर्जा, जलस्रोत तथा सिँचाइमन्त्री शक्तिबहादुर बस्नेतले विद्युतको उत्पादनसंगै आन्तरिक खपतलाई प्रोत्साहन गर्ने र खपतपछि बचत भएको विद्युतमात्र निर्यात गर्ने सरकारको स्पष्ट दृष्टिकोण रहेको बताए । उनले विद्युत् क्षेत्रको कार्ययोजनामा लगानी, उत्पादन, वितरण र व्यवस्थापनका प्रावधान समेटिएको जानकारी दिए ।

विधेयकलाई पूर्ण बनाउन छलफलका आएका विषयहरूलाई सरकारले महत्वका साथ हेरेको उनको भनाइ छ ।

विद्युत् विधेयकमाथि संशोधन प्रस्ताव दर्ता गर्नका लागि ७२ घण्टाको समय तोकिएको छ ।