रवि लामिछानेको दुई दिन तीन रातको हिरासत अवैध : रास्वपा
काठमाडौं । राष्ट्रिय स्वतन्त्र पार्टी (रास्वपा) ले पार्टी सभापति रवि लामिछानेको दुई दिन तीन रातको हिरासत अवैध रहेको बताएको छ ।
शुक्रबार प्रतिनधिसभाको बैठकमा बोल्दै रास्वपाका कार्यवहाक सभापति डोलप्रसाद अर्यालले लामिछानेको पक्राउ समेत कानुनी प्रक्रियाअनुसार नरहेको बताएका हुन् ।
‘…पक्राउ पर्नुभएका रवि लामिछानेलाई २५ गते मात्रै थुनुवा पुर्जी दिएकाले उहाँको उहाँको दुई दिन तीन रातको हिरासत स्वतः अवैध छ,’ उनले भने ।
लामिछाने गत २२ चैतमा पक्राउ परेका थिए । २५ चैतमा मात्रै रुपन्देही लगेर पक्राउ पुर्जी दिइएको अर्यालले बताएका हुन् ।
लामिछानेमाथि राजनीतिक प्रतिसोध साधिएको पनि उनको भनाइ छ ।
‘संसदीय समितिको छानबिन र निष्कर्ष विपरीत उहाँलाई चार वटा जिल्लामा फरक-फरक कानुन टेकेर फौजदारी मुद्दा लगाइयो,’ उनले भने ।
लामिछानेको सांसद पद निलम्बन भएकोप्रति पनि उनको आपत्ति छ ।
‘चितवनका जनताले सुम्पिएको जिम्मवारी निर्वाह गर्न नपरोस् भनेर सम्पति शुद्धीकरणको अभियोग लगाएर सांसद पद निलम्बन गरियो,’ उनले भने ।
८ पुस २०८१ देखि लामिछाने सांसद पदबाट निलम्बनमा छन् ।
सहकारीको बचत अपचलन तथा सम्पत्ति शुद्धीकरणको कसुरमा अभियोग दर्ता भएपछि उनको सांसद पद निलम्बनमा परेको थियो ।
लामिछानेविरुद्ध सहकारी ठगी, संगठित अपराधसहित सम्पत्ति शुद्धीकरणमा पनि कास्की जिल्ला अदालतमा अभियोगपत्र दर्ता भएको जानकारीपत्र प्रहरीले सभामुख देवराज घिमिरेलाई पठाएको थियो । सोही पत्रका आधारमा सभामुख घिमिरेले लामिछानेको सांसद् पद निलम्बन हुन निर्णय गरेका थिए ।
रास्वपाका कार्यवहाक सभापति अर्याल लामिछानेलाई राज्यले गरेको व्यवहारले प्रतिसोध हो भन्ने छर्लङ्ग पारेको पनि बताए ।
कानुनको आधार बिना अदालतको आदेश नलिएरै पक्राउ गरिएको दोहोर्याउँदै उनले भने, ‘प्रहरीको अधिकारीले नै अन्तिम इच्छा भनेर सोध्नुले कानुनी शासनको धब्जी उडाएको छ ।’
